ਜ਼ਿਲਾ ਅਦਾਲਤ ਤੇ ਪੰਜਾਬ-ਹਰਿਆਣਾ ਹਾਈ ਕੋਰਟ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ
ਚੰਡੀਗੜ੍ਹ– ਸਥਾਨਕ ਸੈਕਟਰ-43 ਦੀ ਜ਼ਿਲਾ ਅਦਾਲਤ ਅਤੇ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਨੂੰ 29 ਅਕਤੂਬਰ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਭਰੀ ਚਿੱਠੀ ਮਿਲਣ ਪਿੱਛੋਂ ਵਕੀਲਾਂ ਅਤੇ ਚੰਡੀਗੜ੍ਹ ਪੁਲਸ ਦੇ ਹੋਸ਼ ਉਡ ਗਏ। ਇਹ ਧਮਕੀ ਭਰੀ ਚਿੱਠੀ ਜ਼ਿਲਾ ਬਾਰ ਐਸੋਸੀਏਸ਼ਨ ਦੇ ਪ੍ਰਧਾਨ ਐੱਨ. ਕੇ. ਨੰਦਾ ਨੂੰ ਡਾਕ ਰਾਹੀਂ ਬੁੱਧਵਾਰ ਮਿਲੀ। ਚਿੱਠੀ ਭੇਜਣ ਵਾਲੇ ਨੇ ਖੁਦ ਨੂੰ ਜੈਸ਼-ਏ-ਮੁਹੰਮਦ ਆਰਮੀ ਦਾ ਕਮਾਂਡਰ ਆਦਿਲ ਖਾਨ ਦੱਸਿਆ ਹੈ। ਚਿੱਠੀ ਦੇ ਲਿਫਾਫੇ 'ਤੇ ਭੇਜਣ ਵਾਲੇ ਦਾ ਨਾਂ ਆਦਿਲ ਖਾਨ ਪੁੱਤਰ ਜੈਸ਼ ਖਾਨ ਵਾਸੀ ਪਿੰਡ ਹਸਨਪੁਰਾ ਜ਼ਿਲਾ ਮੋਹਾਲੀ ਲਿਖਿਆ ਹੈ।ਜ਼ਿਲਾ ਬਾਰ ਐਸੋਸੀਏਸ਼ਨ ਦੇ ਮੁਖੀ ਐੱਨ. ਕੇ. ਨੰਦਾ ਨੇ ਇਸ ਬਾਰੇ ਜ਼ਿਲਾ ਅਦਾਲਤ, ਜ਼ਿਲਾ ਤੇ ਸੈਸ਼ਨ ਜੱਜ, ਐੱਸ. ਐੱਸ. ਪੀ. ਚੰਡੀਗੜ੍ਹ ਅਤੇ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਦੇ ਚੀਫ ਜਸਟਿਸ ਨੂੰ ਚਿੱਠੀ ਭੇਜੀ ਹੈ। ਚੰਡੀਗੜ੍ਹ ਪੁਲਸ ਨੇ ਜ਼ਿਲਾ ਅਦਾਲਤ ਦੀ ਸੁਰੱਖਿਆ ਨੂੰ ਵਧਾ ਦਿੱਤਾ ਹੈ। ਇਸ ਤੋਂ ਪਹਿਲਾਂ 12 ਅਕਤੂਬਰ ਨੂੰ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੂੰ ਉਡਾਉਣ ਦੀ ਧਮਕੀ ਭਰੀ ਚਿੱਠੀ ਮਿਲੀ ਸੀ।
ਕਸ਼ਮੀਰ 'ਚ ਸਾਡੀ ਕੌਮ 'ਤੇ ਹੋ ਰਹੇ ਜ਼ੁਲਮ ਬੰਦ ਕੀਤੇ ਜਾਣ
ਐੱਨ. ਕੇ. ਨੰਦਾ ਨੇ ਕਿਹਾ ਕਿ ਚਿੱਠੀ ਉਨ੍ਹਾਂ ਨੂੰ ਬੁੱਧਵਾਰ ਮਿਲੀ। ਇਸ ਵਿਚ ਲਿਖਿਆ ਹੈ ਕਿ ਜੇ ਸਾਡੇ ਲੋਕਾਂ 'ਤੇ ਜ਼ੁਲਮ ਬੰਦ ਨਾ ਕੀਤਾ ਗਿਆ ਤਾਂ ਅਸੀਂ ਮਰਦੇ ਦਮ ਤੱਕ ਜੇਹਾਦ ਦਾ ਰਾਹ ਅਪਣਾਵਾਂਗੇ। ਕਸ਼ਮੀਰ ਵਿਚ ਜ਼ੁਲਮ ਬੰਦ ਕੀਤੇ ਜਾਣ। ਤੁਹਾਨੂੰ ਸਭ ਨੂੰ ਇਹ ਪੈਗਾਮ ਦੇਣਾ ਚਾਹੁੰਦੇ ਹਾਂ ਕਿ 29 ਅਕਤੂਬਰ ਨੂੰ ਦੁਪਹਿਰ 12 ਵੱਜ ਕੇ 18 ਮਿੰਟ 'ਤੇ ਜ਼ਿਲਾ ਅਦਾਲਤ ਅਤੇ 12 ਵੱਜ ਕੇ 28 ਮਿੰਟ 'ਤੇ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦਾ ਅਸੀਂ 'ਉਦਘਾਟਨ' ਕਰਾਂਗੇ। ਤੁਹਾਨੂੰ ਸਭ ਵਕੀਲ ਭਰਾਵਾਂ ਨੂੰ ਬੇਨਤੀ ਹੈ ਕਿ ਤੁਸੀਂ ਸਾਡੇ ਉਦਘਾਟਨ ਤੋਂ ਦੂਰ ਰਹੋ ਕਿਉਂਕਿ ਸਾਡੇ ਉਦਘਾਟਨ ਪਿੱਛੋਂ ਇਹੋ ਜਿਹਾ ਧਮਾਕਾ ਹੋਵੇਗਾ ਕਿ ਤੁਹਾਡੀ ਸਰਕਾਰ ਨੂੰ ਜ਼ਿਲਾ ਅਦਾਲਤ ਅਤੇ ਹਾਈ ਕੋਰਟ ਬਣਾਉਣ ਲਈ ਮੁੜ ਤੋਂ ਮਿਹਨਤ ਕਰਨੀ ਪਏਗੀ। ਅੱਲ੍ਹਾ ਦੀ ਰਹਿਮਤ ਨਾਲ ਅਸੀਂ ਸਭ ਤਿਆਰੀ ਕਰ ਚੁੱਕੇ ਹਾਂ। ਜੈਸ਼-ਏ-ਮੁਹੰਮਦ ਅਤੇ 9/11 ਨੂੰ ਤਾਂ ਤੁਸੀਂ ਚੰਗੀ ਤਰ੍ਹਾਂ ਜਾਣਦੇ ਹੀ ਹੋਵੋਗੇ। ਇਸ ਵਾਰ ਦਾ ਉਦਘਾਟਨ 9/11 ਤੋਂ ਵੀ ਚੰਗਾ ਹੋਵੇਗਾ।
ਚਿੱਠੀ 'ਚ ਜੋ ਲਿਖਿਆ ਹੈ, ਉਸ ਵਿਚ ਪਿੰਡ ਦਾ ਨਾਂ ਠੀਕ ਹੈ ਪਰ ਦੇਸ਼ ਦਾ ਨਾਂ ਪਾਕਿਸਤਾਨ ਹੈ। ਚਿੱਠੀ ਨੂੰ ਪੋਸਟ ਕਰਨ ਵਾਲਾ ਵੀ ਤੁਹਾਡੇ ਵਰਗਾ ਆਦਮੀ ਹੈ। ਕਮਾਂਡੈਂਟ ਆਦਿਲ ਖਾਨ, ਜੈਸ਼-ਏ-ਮੁਹੰਮਦ ਆਰਮੀ, ਜਿਸ ਦਾ ਕੰਮ ਹੈ ਜੇਹਾਦ ਕਰਨਾ, ਉਸ ਜ਼ੁਲਮ ਵਿਰੁੱਧ ਜੋ ਸਾਡੀ ਕੌਮ 'ਤੇ ਬਿਨਾਂ ਕਾਰਣ ਹੋ ਰਿਹਾ ਹੈ।
