ਐਨ.ਡੀ.ਆਰ.ਐਫ ਟੀਮ ਦੁਆਰਾ ਆਫ਼ਤ ਪ੍ਰਬੰਧਨ ਅਤੇ ਬਚਾਅ ਬਾਰੇ ਐਨ.ਸੀ.ਸੀ ਕੈਡਿਟਾਂ ਨੂੰ ਸਿਖਲਾਈ

ਮਲੋਟ : ਐਨ.ਸੀ.ਸੀ ਅਕੈਡਮੀ ਮਲੋਟ ਵਿਖੇ 5 ਪੰਜਾਬ ਗਰਲਜ਼ ਬਟਾਲੀਅਨ ਮੋਗਾ ਦੁਆਰਾ 29 ਮਈ ਤੋਂ 7 ਜੂਨ ਤੱਕ ਲਗਭਗ 600 ਐਨ.ਸੀ.ਸੀ ਕੈਡਿਟਾਂ ਲਈ ਦਸ ਦਿਨਾਂ ਸਿਖਲਾਈ ਕੈਂਪ ਦਾ ਆਯੋਜਨ ਕਰ ਰਹੀ ਹੈ। ਜਿਸ ਵਿੱਚ ਲੁਧਿਆਣਾ, ਮੋਗਾ, ਫਿਰੋਜ਼ਪੁਰ, ਮਲੋਟ ਅਤੇ ਅਬੋਹਰ ਜ਼ਿਲ੍ਹਿਆਂ ਦੇ 600 ਲੜਕੇ ਅਤੇ ਲੜਕੀਆਂ ਕੈਡਿਟਸ ਹਿੱਸਾ ਲੈ ਰਹੀਆਂ ਹਨ। ਕੈਂਪ ਦੀ ਸ਼ੁਰੂਆਤ ਕਰਨਲ ਸੁਨੀਲ ਕੁਮਾਰ ਦੇ ਉਦਘਾਟਨੀ ਭਾਸ਼ਣ ਨਾਲ ਹੋਈ। ਸਾਲਾਨਾ ਐਨ.ਸੀ.ਸੀ ਸਿਖਲਾਈ ਤੋਂ ਇਲਾਵਾ, ਕੈਂਪ ਇੱਕ ਇੰਟਰ-ਬਟਾਲੀਅਨ ਆਰਮੀ ਕੈਂਪ ਮੁਕਾਬਲਾ ਵੀ ਆਯੋਜਿਤ ਕਰ ਰਿਹਾ ਹੈ, ਜਿੱਥੇ ਵੱਖ-ਵੱਖ ਐਨ.ਸੀ.ਸੀ ਬਟਾਲੀਅਨਾਂ ਦੀਆਂ ਵਿਸ਼ੇਸ਼ ਟੀਮਾਂ ਵੱਲੋਂ ਨਕਸ਼ੇ ਰੀਡਿੰਗ, ਹੈੱਲਥ ਹਾਈਜੀਨ, ਫਾਇਰਿੰਗ, ਆਬਸਟੈਕਲ ਟ੍ਰੇਨਿੰਗ ਅਤੇ ਟੈਂਟ ਲਗਾਉਣਾ ਆਦਿ ਦੀ ਸਿਖਲਾਈ ਪ੍ਰਦਾਨ ਕੀਤੀ ਜਾ ਰਹੀ। ਇੱਕ ਵਿਸ਼ੇਸ਼ ਗਤੀਵਿਧੀ ਵਿੱਚ 7 ਬਟਾਲੀਅਨ ਐਨ.ਡੀ.ਆਰ.ਐਫ ਨੇ ਕੈਡਿਟਾਂ ਨੂੰ ਆਫ਼ਤ ਪ੍ਰਬੰਧਨ ਅਤੇ ਬਚਾਅ ਬਾਰੇ ਇੱਕ ਦਿਨ ਦੀ ਵਿਸ਼ੇਸ਼ ਸਿਖਲਾਈ ਪ੍ਰਦਾਨ ਕੀਤੀ।

ਇਸ ਪ੍ਰੋਗਰਾਮ ਵਿੱਚ ਕੈਡਿਟਾਂ ਨੂੰ ਸਿਖਾਇਆ ਗਿਆ ਕਿ ਹੜ੍ਹ, ਭੂਚਾਲ, ਅੱਗ ਅਤੇ ਸੜਕ ਹਾਦਸਿਆਂ ਵਰਗੀਆਂ ਐਮਰਜੈਂਸੀ ਵਿੱਚ ਬਚਾਅ ਕਾਰਜ ਕਿਵੇਂ ਕਰਨੇ ਹਨ ਅਤੇ ਲੋਕਾਂ ਦੀ ਸਹਾਇਤਾ ਕਿਵੇਂ ਕਰਨੀ ਹੈ। ਐਨ.ਡੀ.ਆਰ.ਐਫ ਟੀਮ ਨੇ ਕੈਡਿਟਾਂ ਨੂੰ ਸੁਰੱਖਿਆ ਨਿਯਮ ਸਿਖਾਏ, ਲੋਕਾਂ ਨੂੰ ਸੁਰੱਖਿਅਤ ਢੰਗ ਨਾਲ ਕਿਵੇਂ ਕੱਢਣਾ ਹੈ, ਸੀਪੀਆਰ ਕਿਵੇਂ ਦੇਣਾ ਹੈ, ਜ਼ਖਮੀ ਵਿਅਕਤੀ ਦੀ ਸਹਾਇਤਾ ਕਿਵੇਂ ਕਰਨੀ ਹੈ ਅਤੇ ਮੁੱਢਲੀ ਸਹਾਇਤਾ ਕਿਵੇਂ ਦੇਣੀ ਹੈ। ਟੀਮ ਨੇ ਜ਼ਰੂਰੀ ਸੁਰੱਖਿਆ ਉਪਕਰਨਾਂ ਦੀ ਵਰਤੋਂ ਦਾ ਪ੍ਰਦਰਸ਼ਨ ਵੀ ਕੀਤਾ। ਕੈਡਿਟਾਂ ਨੇ ਪ੍ਰੋਗਰਾਮ ਵਿੱਚ ਉਤਸ਼ਾਹ ਨਾਲ ਹਿੱਸਾ ਲਿਆ ਅਤੇ ਐਨ.ਡੀ.ਆਰ.ਐਫ ਟੀਮ ਨੂੰ ਕਈ ਸਵਾਲ ਪੁੱਛੇ। ਅਧਿਕਾਰੀਆਂ ਨੇ ਕੈਡਿਟਾਂ ਨੂੰ ਤੰਦਰੁਸਤ ਰਹਿਣ, ਸੁਚੇਤ ਰਹਿਣ ਅਤੇ ਸਮਾਜ ਦੀ ਸੇਵਾ ਲਈ ਹਮੇਸ਼ਾ ਤਿਆਰ ਰਹਿਣ ਲਈ ਉਤਸ਼ਾਹਿਤ ਕੀਤਾ। ਕੈਂਪ ਕਮਾਂਡੈਂਟ ਕਰਨਲ ਸੁਨੀਲ ਕੁਮਾਰ ਦੇ ਨਿਰਦੇਸ਼ਾਂ ਹੇਠ ਅਤੇ ਡਿਪਟੀ ਕੈਂਪ ਕਮਾਂਡੈਂਟ ਦੀ ਨਿਗਰਾਨੀ ਹੇਠ ਕੁਸ਼ਲਤਾ ਨਾਲ ਚਲਾਇਆ ਜਾ ਰਿਹਾ ਹੈ। ਕੈਂਪ ਨੂੰ ਸਫਲਤਾਪੂਰਵਕ ਚਲਾਉਣ ਵਿੱਚ ਆਰ.ਐਮ. ਏ.ਐਨ.ਓ. ਪੀ.ਆਈ ਸਟਾਫ, ਜੀ.ਸੀ.ਆਈ ਅਤੇ ਸਿਵਲ ਸਟਾਫ ਪੂਰਾ ਸਹਿਯੋਗ ਕਰ ਰਹੇ ਹਨ।

Author : Malout Live