3704 ਅਧਿਆਪਕਾਂ ਵੱਲੋਂ ਡੀ.ਪੀ.ਆਈ (ਸੈ.ਸਿ) ਮੋਹਾਲੀ ਵਿਖੇ ਪਿਛਲੇ ਚਾਰ ਦਿਨਾਂ ਤੋਂ ਪੱਕਾ ਧਰਨਾ ਜਾਰੀ

ਮਲੋਟ (ਪੰਜਾਬ) : 3704 ਅਧਿਆਪਕਾਂ ਵੱਲੋਂ ਪਿਛਲੇ ਲੰਬੇ ਸਮੇਂ ਤੋਂ ਪੰਜਾਬ ਪੇਅ-ਸਕੇਲ ਹਾਸਿਲ ਕਰਨ ਲਈ ਕਾਨੂੰਨੀ ਲੜਾਈ ਲੜ ਕੇ ਜਿੱਤ ਪ੍ਰਾਪਤ ਕਰਨ ਤੋਂ ਬਾਅਦ ਵੀ ਸਿੱਖਿਆ ਵਿਭਾਗ ਪੰਜਾਬ ਪੇਅ-ਸਕੇਲ ਜ਼ਮੀਨੀ ਰੂਪ ਵਿੱਚ ਲਾਗੂ ਕਰ ਸਭ ਜ਼ਿਲ੍ਹਿਆਂ ਦੀ ਬਣਦੀ ਤਨਖ਼ਾਹ ਜਾਰੀ ਨਹੀਂ ਕਰ ਰਿਹਾ। 3704 ਅਧਿਆਪਕ ਯੂਨੀਅਨ ਦੇ ਸੂਬਾ ਪ੍ਰਧਾਨ ਹਰਜਿੰਦਰ ਸਿੰਘ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਉਹਨਾਂ ਵੱਲੋਂ ਡੀ.ਪੀ.ਆਈ ਦਫ਼ਤਰ ਦੇ ਸਾਹਮਣੇ ਇਸ ਸੰਬੰਧੀ ਆਪਣਾ ਵਿਰੋਧ ਜਤਾਉਣ ਲਈ 3704 ਅਧਿਆਪਕਾਂ ਦੇ ਲਗਭਗ 2500 ਅਧਿਆਪਕਾਂ ਨੇ ਪੱਕਾ ਮੋਰਚਾ ਗੱਡ ਦਿੱਤਾ ਅਤੇ ਪਿਛਲੇ ਚਾਰ ਦਿਨਾਂ ਤੋਂ ਵਰਦੇ ਮੀਂਹ ਵਿੱਚ ਵੀ ਦਿਨ-ਰਾਤ ਆਪਣਾ ਵਿਰੋਧ ਜਤਾਉਣ ਲਈ ਸਿੱਖਿਆ ਵਿਭਾਗ ਦਾ ਗੇਟ ਮੱਲਿਆ ਹੋਇਆ ਹੈ। ਕਾਨੂੰਨੀ ਤੌਰ ਤੇ ਜਿੱਤ ਪ੍ਰਾਪਤ ਕਰਨ ਤੋਂ ਬਾਅਦ ਲਗਭਗ 20 ਜ਼ਿਲ੍ਹਿਆਂ ਵਿੱਚ 70% ਤੋਂ ਵੱਧ ਅਧਿਆਪਕਾਂ ਦੀ ਤਨਖਾਹ ਪੰਜਾਬ ਦੇ ਚੱਲ ਰਹੇ ਛੇਵੇਂ ਪੇਅ-ਸਕੇਲ ਅਧੀਨ ਪਿਛਲੇ ਦੋ ਮਹੀਨਿਆਂ ਤੋਂ ਜਾਰੀ ਹੋ ਰਹੀ ਹੈ। ਪ੍ਰੰਤੂ ਕੁੱਝ ਜ਼ਿਲੇ ਦੇ ਸਕੂਲ ਮੁੱਖੀਆਂ ਨੇ ਗਲਤ ਪੇਅ ਫਿਕਸੇਸ਼ਨ ਕੀਤੀਆਂ ਹਨ ਤੇ ਤਨਖਾਹਾਂ ਵੀ ਜਾਰੀ ਨਹੀਂ ਕੀਤੀਆਂ। ਜਦੋਂ ਕਿ ਡੀ.ਪੀ. ਆਈ (ਸੈ.ਸਿ) ਨਾਲ ਪ੍ਰਸ਼ਾਸਨ ਨੇ ਮੀਟਿੰਗ ਕਰਵਾਈ।

ਉਹਨਾਂ ਵੱਲੋਂ ਵੀ ਪੰਜਾਬ ਪੇਅ-ਸਕੇਲ ਲਾਗੂ ਕਰਨ ਦੇ ਪੂਰਨ ਤੱਥਾਂ ਤੇ ਹਾਮੀ ਭਰਨ ਤੋਂ ਬਾਅਦ ਦੱਸਿਆ ਕਿ ਸਭ ਜ਼ਿਲ੍ਹਿਆਂ ਨੂੰ ਰੂਲਾਂ ਮੁਤਾਬਿਕ ਤਨਖ਼ਾਹ ਦੇਣ ਲਈ ਅਸੀਂ ਪੱਤਰ ਜਾਰੀ ਕਰ ਚੁੱਕੇ ਹਾਂ ਅਤੇ ਸੰਬੰਧਿਤ ਜ਼ਿਲ੍ਹਿਆਂ ਦੇ ਜ਼ਿਲ੍ਹਾ ਸਿੱਖਿਆ ਅਫ਼ਸਰਾਂ ਨੂੰ ਵੀ ਫੋਨ ਕਰਕੇ ਵੀ ਸਹੀ ਤਨਖਾਹ ਜਾਰੀ ਕਰਨ ਲਈ ਕਹਿ ਚੁੱਕੇ ਹਾਂ, ਇਸ ਸੰਬੰਧੀ ਉਹ ਸੈਕਟਰੀ ਸਿੱਖਿਆ ਵਿਭਾਗ ਦੇ ਨਾਲ ਲਗਾਤਾਰ ਮੀਟਿੰਗਾਂ ਕਰ ਰਹੇ ਹਨ ਅਤੇ ਤਨਖ਼ਾਹ ਸਹੀ ਫਿਕਸੇਸਨ ਅਨੁਸਾਰ ਜਲਦ ਹੀ ਜਾਰੀ ਕਰ ਦਿੱਤੀ ਜਾਵੇਗੀ। ਇਸ ਮੌਕੇ ਆਗੂ ਜੀਵਨਜੋਤ ਸਿੰਘ ਮਾਨਸਾ, ਜਸਵਿੰਦਰ ਸ਼ਾਹਪੁਰ ਕਲਾਂ, ਦਵਿੰਦਰ ਕੁਮਾਰ ਸੰਗਰੂਰ ਅਤੇ ਯਾਦਵਿੰਦਰ ਸਿੰਘ ਮੋਗਾ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਉਹਨਾਂ ਵੱਲੋਂ ਲਗਾਤਾਰ ਸਿੱਖਿਆ ਵਿਭਾਗ ਨਾਲ ਮੀਟਿੰਗਾ ਕਰਨ ਤੋਂ ਬਾਅਦ ਅੰਤ ਵਿਚ ਪੱਕਾ ਮੋਰਚਾ ਲਗਾਉਣ ਦਾ ਕਦਮ ਚੁੱਕਿਆ ਗਿਆ ਹੈ। ਇਹ ਮੋਰਚਾ ਬਣਦੇ ਲਾਭ ਸਭ 3704 ਅਧਿਆਪਕਾਂ ਨੂੰ ਜਾਰੀ ਹੋਣ ਤੱਕ ਜਾਰੀ ਰਹੇਗਾ ਅਤੇ ਜੇਕਰ ਇਸ ਤਰ੍ਹਾਂ ਹੀ ਵਿਭਾਗ ਟਾਲਮਟੋਲ ਕਰਦਾ ਰਿਹਾ ਤਾਂ ਇਸ ਦੇ ਗੰਭੀਰ ਨਤੀਜੇ ਨਿਕਲਣਗੇ ਅਤੇ ਜਿਸ ਦੇ ਜ਼ਿੰਮੇਵਾਰ ਡੀ.ਪੀ.ਆਈ (ਸੀ.ਸੈ), ਸੰਬੰਧਿਤ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਤੇ ਸਕੂਲ ਮੁੱਖੀ ਤੇ ਮੋਹਾਲੀ ਪ੍ਰਸ਼ਾਸਨ ਹੋਵੇਗਾ। ਇਹ ਜਾਣਕਾਰੀ 3704 ਅਧਿਆਪਕ ਆਗੂ ਰਾਜੇਸ਼ਵਰ ਰਾਏ ਨੇ ਸਾਂਝੀ ਕੀਤੀ।

Author : Malout Live