ਬੀਤੇ ਦਿਨੀਂ ਬਾਰ ਐਸੋਸੀਏਸ਼ਨ ਮਲੋਟ ਦੀ ਖੁਸ਼ਨੁਮਾ ਮਾਹੌਲ ਵਿੱਚ ਹੋਈ ਚੋਣ
, ,
ਮਲੋਟ (ਪਵਨ ਨੰਬਰਦਾਰ): ਬੀਤੇ ਦਿਨੀਂ ਬਾਰ ਐਸੋਸੀਏਸ਼ਨ ਮਲੋਟ ਦੀ ਚੋਣ ਅਬਜ਼ਰਵਰ ਵਕੀਲ ਚੁੰਨੀ ਲਾਲ ਭਾਰਤੀ ਦੀ ਦੇਖ-ਰੇਖ 'ਚ ਬੜੇ ਹੀ ਖੁਸ਼ਨੁਮਾ ਮਾਹੌਲ ਵਿੱਚ ਹੋਈ। ਚੋਣ ਦੇ ਆਏ ਨਤੀਜਿਆਂ ਮੁਤਾਬਿਕ ਇਸ ਵਾਰ ਚੋਣਾਂ 'ਚ ਬੀਬੀਆਂ ਦੀ ਝੰਡੀ ਰਹੀ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਚੁੰਨੀ ਲਾਲ ਭਾਰਤੀ ਨੇ ਦੱਸਿਆ ਕਿ ਸਵੇਰੇ 09:00 ਵਜੇ ਪੋਲਿੰਗ ਸ਼ੁਰੂ ਕੀਤੀ ਗਈ। ਜਿਸ ਦੀ ਕਿ ਸਮਾਪਤੀ ਸ਼ਾਮ 04:00 ਵਜੇ ਹੋਈ। ਚਾਰ ਵਜੇ ਗਿਣਤੀ ਸ਼ੁਰੂ ਹੋਈ ਤੇ ਉਪਰੰਤ ਆਏ ਨਤੀਜਿਆਂ ਮੁਤਾਬਿਕ ਪ੍ਰਧਾਨਗੀ ਦੇ ਅਹੁਦੇ ਲਈ ਚੋਣ ਲੜ ਰਹੀ ਵਿਦੂਸ਼ੀ ਭੁੱਲਰ ਨੇ 88 ਵੋਟਾਂ ਪ੍ਰਾਪਤ ਕਰਦਿਆਂ ਆਪਣੇ ਵਿਰੋਧੀ ਜਸਪਾਲ ਸਿੰਘ ਸੰਧੂ ਜਿੰਨ੍ਹਾਂ ਨੂੰ ਕਿ 82 ਵੋਟਾਂ ਮਿਲੀਆਂ, ਨੂੰ 6 ਵੋਟਾਂ ਦੇ ਫਰਕ ਨਾਲ ਹਰਾ ਕੇ 'ਪ੍ਰਧਾਨਗੀ' ਆਪਣੇ ਨਾਂ ਕੀਤੀ ਜਦਕਿ ਵਕੀਲ ਮੈਡਮ ਸਿੰਪੀ ਕਾਮਰਾ ਪਹਿਲਾਂ ਹੀ ਸਰਵਸੰਮਤੀ ਨਾਲ ਮੀਤ ਪ੍ਰਧਾਨ ਚੁਣ ਲਏ ਗਏ ਸਨ।
ਇਸ ਤੋਂ ਇਲਾਵਾ ਵਿਕਾਸ ਸਚਦੇਵਾ ਜਨਰਲ ਸਕੱਤਰ ਤੇ ਮੇਵਾ ਰਾਮ ਕਾਇਤ ਜੁਆਇੰਟ ਸਕੱਤਰ ਦੇ ਅਹੁਦਿਆਂ 'ਤੇ ਕਾਬਜ ਰਹੇ। ਵਕੀਲ ਰਜਿੰਦਰ ਕੁਮਾਰ ਨੂੰ ਵੀ ਸਰਵਸੰਮਤੀ ਨਾਲ ਖਜ਼ਾਨਚੀ ਚੁਣ ਲਿਆ ਗਿਆ। ਇਸ ਮੌਕੇ ਵਕੀਲਾਂ ਨੇ ਨਵ-ਨਿਯੁਕਤ ਪ੍ਰਧਾਨ ਵਿਦੂਸ਼ੀ ਭੁੱਲਰ ਤੇ ਬਾਕੀ ਜੇਤੂਆਂ ਨੂੰ ਹਾਰ ਪਾਉਂਦਿਆਂ ਲੱਡੂਆਂ ਨਾਲ ਮੂੰਹ ਮਿੱਠਾ ਕਰਕੇ ਜਿੱਤ ਦੀ ਵਧਾਈ ਦਿੱਤੀ। ਇਸ ਮੌਕੇ ਬੋਲਦਿਆਂ ਜੇਤੂਆਂ ਵਿਦੂਸ਼ੀ ਭੁੱਲਰ, ਸਿੰਪੀ ਕਮਰਾ, ਵਿਕਾਸ ਸਚਦੇਵਾ, ਮੇਵਾ ਰਾਮ ਕਾਇਤ ਅਤੇ ਰਜਿੰਦਰ ਕੁਮਾਰ ਨੇ ਕਿਹਾ ਕਿ ਓਹ ਬਾਰ ਐਸੋਸੀਏਸ਼ਨ ਨੂੰ ਯਕੀਨ ਦਿਵਾਉਂਦੇ ਹਨ ਕਿ ਓਹ ਆਪਣੇ ਅਹੁਦਿਆਂ ਦੀ ਮਾਨ ਮਰਿਆਦਾ ਨੂੰ ਹਮੇਸ਼ਾਂ ਕਾਇਮ ਰੱਖਦਿਆਂ ਪੂਰੀ ਇਮਾਨਦਾਰੀ, ਤਨਦੇਹੀ ਨਾਲ ਆਪਣੀ ਜਿੰਮੇਵਾਰੀ ਨਿਭਾਉਣਗੇ। Author: Malout Live
